2/11 | 一人一信要求市建局撤回對天台租戶不平等政策

各位朋友:

相信大家都會對今年8﹣9月順寧道重建關注組的天台文化節猶有記憶。

天台文化節的主角何生,係一個天台屋街坊。喺攪天台文化節之前。市區重建局要求佢要係人口凍結兩年多後,交四年前的住址證明出黎,交唔到就無得安置。係攪緊天台文化節果陣,八月中。市區重建局出左封信比何生。封信其中一段寫住:

「你須同意簽署由本局擬訂之適當文件,放棄一切在法律、公平原則或體恤情況下所賦予之所有權利、申索及索求……」

然後就俾左一份「正式協議書」何生,要何生簽名承諾2013年1月中搬走,但何生承諾之前,市建局不會做任何安置的程序。如果市建局及後俾左啲令你無法原區安置的屋俾你,你都要硬食,事後仲要無得追究。 市區重建局成立初寫下一紙《市區重建策略》,承諾會「保存社區網絡」、會「妥善安置租戶」等等,就提都無提過。事實上,市建局自己手握〔收回土地條例〕,就算連不聽話的業主也可以抬出來,何況更弱勢的租戶?市建局這是多此一舉,根本無須這様咄咄逼人,其實無非都是想恐嚇人,以及日後還可以公開同外間講:「係佢自己簽了協議又不肯走!」

之後我地再問返過去受重建影響既街坊,原來好多人都無奈簽過呢份協議。但何生就話:「有咩理由,一份協議,只保障你不保障我,又要叫我簽名同意,有無搞錯!」同時,何生也希望,為以後的重建街坊打破不平等的慣例,希望日後街坊無須簽這些不平等條約。

但係如果唔簽既話,又到限期都未走就會點呢?根據政府給予市區重建局的收回土地大權,市建局可以強行收樓,出執達令封屋,到時何生可能會咩安置都無。

就此順寧道重建關注組發起一個一人一信行動,反對這份不合理的協議,同時反對市建局一切對最弱勢的租戶的不公平政策。

我哋會喺2012月11日2日的中午十二點半上門示威,去到市區重建局總部門口,大家親自將投訴信送交市區重建局。

我地邀請大家親身來到,逐封逐封信遞上,去令市區重建局感受到每一封信都係有重量。每一個寫信人都係不滿意市區重建局對待市民的態度,希望支持何生之餘,亦令之後的街坊不用再簽放棄所有權利的不平等協議。

日期:2012年11月2日 星期五

時間:12:30-2:30pm

地點: 上環中遠大廈市建局總部樓下廣場 (上環地鐵E出口一出就見到)

參與方式:

1)你可以在我們預備定的信上籤名,當然更歡迎你在上面加上自己的意見,甚或你自己另寫一封! (信的主要內容請見https://shunning6983.wordpress.com/1102letter/ ‎)

2) 在上述時間地點,我們會誠邀市建局負責人來,我們排好隊,要佢逐封收信,每封信影張相!

3) 請你來之前,向你身邊至少三位朋友講述呢個故事,並邀請他們也寫信,然後由你帶來交給市建局的人!

欲參加者,請電郵shunninggp@gmail.com,或致電61887262。

謝謝!

順寧道重建關注組敬約

~~~~~~~~~~~~~~~~~~~~~~~~~~~~~

更詳細的事件經過,請往:

天台文化節之講古時段(一)

http://rooftopfestival.wordpress.com/2012/09/22/stories/

天台文化節生生不息之講古時段(二): 你須…放棄一切…?

http://rooftopfestival.wordpress.com/2012/10/04/storiesuralettertoho/

舊區更新電視~順寧道台

http://rooftopfestival.wordpress.com

天台文化節

http://rooftopfestival.wordpress.com

https://www.facebook.com/pages/%E5%A4%A9%E5%8F%B0%E6%96%87%E5%8C%96%E7%AF%80/334189380000466?ref=stream